Obradoiro “A horta ecolóxica”

O venres pasado puxemos en marcha o programa A horta ecolóxica que durará ata o mes de maio de 2020.

O programa consta duns obradoiros medioambientais, de periodicidade mensual, programados desde a ANPA Fontela e que terán lugar dentro do horario lectivo.

Este ano participará neste programa o alumnado de Educación Infantil e 1º e 2º de Educación Primaria. Un día ao mes participarán nuns obradoiros medioambientais impartidos por Trillium.

Como ben sabedes, o CEIP das Fontiñas conta con dúas hortas escolares ubicadas nos patios dos centros de Educación Infantil e Primaria.

Estes obradoiros propostos desde a ANPA Fontela xira ao redor deste recurso educativo de aprendizaxe, coa idea de melloralo e dinamizalo mediante o desenvolvemento dunha serie de obradoiros específicos que axuden á rapazada a adquirir coñecementos que lles permitan comprender, dun xeito sinxelo, a natureza e os seus ciclos (procesos físicos, químicos, biolóxicos…) o estudo da agro-ecoloxía con prácticas baseadas no coñecemento científico. E con esta finalidade, desenvolveranse estas sesións prácticas nas hortas.

Programa Melibea: cuarta sesión

desde o Departamento de Educación e Cidadanía do Concello ofértase aos centros educativos da cidade que o desexen o programa de Educación Afectivo Sexual – Programa “Melibea”.

O próximo xoves 13 de xuño impartirase a CUARTA sesión para as familias sobre “Educación sexual das crianzas”.

As crianzas poderán participar de balde, do servizo de Ludoteca. Soamente tedes que reservar praza enviando un correo electrónico á dirección anpafontela@gmail.com, indicando nome, apelidos e idade das crianzas, xunto co nome da persoa de contacto.

 

PATIO EN REFORMAS: NOVIDADES

Como ben sabedes, nos últimos meses levamos a cabo unha serie de actividades (charlas, obradoiros e xornadas de observación) sobre os patios de Primaria, tanto o exterior como o cuberto.

No transcurso deste traballo detectamos unha serie de deficiencias de seguridade, salubridade e mobilidade que, na nosa opinión, merecen unha intervención urxente. Moitas delas foron indicadas polo propio alumnado.

Por esta razón, decidimos elaborar un informe específico con apoio fotográfico

O pasado martes, 9 de abril, presentamos por rexistro esta información á dirección do CEIP das Fontiñas, á Concellaría de Educación (Concello de Santiago de Compostela) e á Xefatura Territorial de Educación (Xunta de Galicia), para dar coñecemento ás autoridades competentes e solicitar que fagan unha valoración técnica da situación actual e subsanen unhas deficiencias que, ao noso ver, poñen en risco o benestar das nosas crianzas.

Para máis información podedes consultar tamén

-o informe

-as conclusións e propostas de mellora

Proxecto Melibea

Desde o Departamento de Educación e Cidadanía do Concello ofértase aos centros educativos da cidade que o desexen un completo programa de Educación Afectivo Sexual – Programa “Melibea”.

Nesta oferta lanzaranse tres liñas de traballo para 5º e 6º de Primaria. Unha desas liñas é específica para as familias (pilares fundamentais da educación de nenas e nenos) e consistiría nunha sesión de 2 horas ao mes ao longo do curso (de febreiro a xuño) impartida en horario de tarde.

Por iso, necesitamos coñecer cal sería o interese de participación das familias de Fontiñas.
Se estás interasado ou interesada envíanos un correo a anpafontela@gmail.com indicando o teu nome.

Para máis información (metodoloxía, actividades, obxetivos, etc.) podedes consultar este documento.