PATIO EN REFORMAS: NOVIDADES

Como ben sabedes, nos últimos meses levamos a cabo unha serie de actividades (charlas, obradoiros e xornadas de observación) sobre os patios de Primaria, tanto o exterior como o cuberto.

No transcurso deste traballo detectamos unha serie de deficiencias de seguridade, salubridade e mobilidade que, na nosa opinión, merecen unha intervención urxente. Moitas delas foron indicadas polo propio alumnado.

Por esta razón, decidimos elaborar un informe específico con apoio fotográfico

O pasado martes, 9 de abril, presentamos por rexistro esta información á dirección do CEIP das Fontiñas, á Concellaría de Educación (Concello de Santiago de Compostela) e á Xefatura Territorial de Educación (Xunta de Galicia), para dar coñecemento ás autoridades competentes e solicitar que fagan unha valoración técnica da situación actual e subsanen unhas deficiencias que, ao noso ver, poñen en risco o benestar das nosas crianzas.

Para máis información podedes consultar tamén

-o informe

-as conclusións e propostas de mellora

Advertisements

Proxecto Melibea

Desde o Departamento de Educación e Cidadanía do Concello ofértase aos centros educativos da cidade que o desexen un completo programa de Educación Afectivo Sexual – Programa “Melibea”.

Nesta oferta lanzaranse tres liñas de traballo para 5º e 6º de Primaria. Unha desas liñas é específica para as familias (pilares fundamentais da educación de nenas e nenos) e consistiría nunha sesión de 2 horas ao mes ao longo do curso (de febreiro a xuño) impartida en horario de tarde.

Por iso, necesitamos coñecer cal sería o interese de participación das familias de Fontiñas.
Se estás interasado ou interesada envíanos un correo a anpafontela@gmail.com indicando o teu nome.

Para máis información (metodoloxía, actividades, obxetivos, etc.) podedes consultar este documento.

Seguimos traballando no proxecto PATIO EN REFORMAS!!

Como xa sabedes, o proxecto PATIO EN REFORMAS é unha das actuacións iniciadas dende a ANPA Fontenla para este curso escolar 2018/2019. O que pretendemos é lograr a transformación do patio escolar do CEIP As Fontiñas dende unha perspectiva de coeducación, naturalización e incorporación da perspectiva de xénero. Podes consultar aquí cómo vai avanzando o proxecto. 

Podemos facer este proxecto grazas á axuda obtida da Deputación da Coruña para entidades sen ánimo de lucro.

Nas imaxes, a rapazada de Primaria aportando ideas nalgún dos obradoiros realizados:

Este xoves: “O xogo filial”

 

No marco das actividades propostas pola ANPA para este ano, e subvencionadas pola Deputación da Coruña, aberta a toda a comunidade educativa, o xoves, 20 de decembro, ás 16.30h, na Biblioteca do CEIP das Fontiñas, haberá unha merenda-conversa na que Fátima Bermejo, mamá deste CEIP, conduciranos a unha reflexión activa sobre a comunicación afectiva entre persoas adultas e crianzas, e sobre o significativo papel do xogo para a creación de vínculos seguros.

Mentres participamos na merenda-conversa e compartimos un café, as nenas e os nenos poderán participar ou dispor, sen custo, do servizo de Ludoteca. Soamente tedes que reservar praza, indicando nome, apelidos da crianza, curso e persoa de contacto en anpafontela@gmail.com  antes do mércores 19 de decembro.

PATIO EN REFORMAS… EU CREO NO RECREO!

C.E.I.P. Fontiñas

Dende a ANPA Fontela cremos firmemente na importancia do recreo, na necesidade irrenunciable de que as crianzas gocen no colexio dun tempo de ocio de calidade. De feito, levamos cursos empregando o lema de “Eu creo no recreo” en diversas campañas e actividades.
Dende hai tempo, as familias percibimos que os espazos de patio do noso centro, especialmente no edificio de Primaria, precisan ser mellorados e adaptados ás necesidades de todos os nenos e nenas. Por iso, na última subvención á que concorremos da Deputación da Coruña, solicitamos e concedéronsenos fondos para iniciar un proceso de remuda. Nesta primeira fase, queremos obter unha diagnose clara do que acontece: como é o patio e como nos gustaría que fose. É preciso ter unha folla de ruta para saber que queremos e que recursos e finanzamento son necesarios para acadalo.
Para acometer esta tarefa queremos recoller a opinión de todas as persoas que configuramos o  CEIP das Fontiñas: alumnado, persoal docente, de administración e servizos e tamén das familias. Estes días veríades chegar a casa unha enquisa da ANPA na mochila da rapazada. É de vital importancia que a cubrades e que a entreguedes na conserxería ou na aula ao profesorado antes do próximo mércores día 5 de decembro.
Este é o só o primeiro paso dun proxecto moito máis amplo que se desenvolverá non só ao longo deste curso, senón tamén nos vindeiros.  Pincha aquí para coñecer máis sobre esta primeira fase, a de diagnose.
A empresa que vai levar a cabo esta tarefa é Trillium. Non dubidedes en chamar para calquera consulta, dúbida ou suxerencia ao seu teléfono de contacto: 687 51 35 35.